Paggamit ng visual aids sa paglinang ng binasang tula

Abstract

Ang pag-aaral na ito ay may layuning alamin ang epekto ng paggamit ng visual aids sa paglinang ng binasang tula ng 30 mag-aaral sa Ikatlong Baitang, Lungsod ng Iloilo, Taong-Panuruan 2023- 2024 na ginamitan ng purposive sampling. Ang ginamit sa kwantitatibong disenyo ng pananaliksik ay pre-experimental. Nagkaroon ng pretest at posttest sa pagtukoy ng antas ng pag-unawa ng mga mag-aaral sa pagbasa ng tula bago at pagkatapos gamitan ng visual aids. Gamit ang Wilcoxon Signed Rank Test ay natukoy ang makabuluhang pagkakaiba sa antas ng pag-unawa ng mga mag-aaral bago at pagkatapos gamitan ng visual aids sa pagbasa ng tula. Mula sa dating may katamtamang (M=28.43) antas ng pag-unawa ng mga mag-aaral bago gamitan ng visual aids ay tumaas at naging mahusay (M=38.55) ang resulta nito pagkatapos gamitan ng visual aids. Ito’y nangangahulugang epektibo ang paggamit ng visual aids sa paglinang ng pagbasa ng mga mag-aaral sa tula. Ang resulta ng pag-aaral ay nagpapatunay na may makabuluhang pagkakaiba sa antas ng literal, inperensyal, at kritikal na pag-unawa bago at pagkatapos ginamit ang visual aids sa pag-unawa sa binasang mga tula. Iminumungkahi ng pag-aaral na ito na patuloy na gamitin ang visual aids sa pagtuturo upang lalong malinang ang kasanayan sa pagbasa ng mga mag-aaral sa asignaturang Filipino sa elementarya.